Prosjektbeskrivelse
Alt liv er avhengig av vatn. Med klimaendringar forandrar dette forholdet seg gjennom meir tørke og meir flaum, mangel på nedbør, kraftigare nedbør, minkande vasskjelder, dårlegare vasskvalitet, fordriving og aukande utryggleik. Ofte byggjer tiltak for å handtere denne uforutsigbarheita på tekniske løysingar og regulering for å sikre tilgangen på vatn. Slike tiltak kan vere livsviktige og er ofte tilverka med omsyn til lokalsamfunn. Samstundes kan dei òg overskygge lokale og urfolks måtar å leve med og forstå vatn og endring på. Lokalkunnskap og urfolkskunnskap om vatn er ofte bygd på tradisjonar, erfaringar og praksis forma over lang tid der lokale forhold til stadigheit har vorte utsette for endring. Dette er kunnskap som er vorte til gjennom fleksibilitet og tilpassing. Community Water Systems vil undersøkje korleis desse formene for lokalkunnskap og urfolkskunnskap kan nyttast for å møte vassrelaterte utfordringar. Prosjektet søkjer å inkludere lokale røyster, deira erfaringar og kunnskap. Me ynskjer å skape møteplassar der lokalkunnskap og urfolkskunnskap kan verke saman med tekniske løysingar.
Samfunna og stadene vi samarbeider med, er ulike. Dei er unike kulturar med særeigne forhold, men deler ei historie knytt til kolonisering og marginalisering. Dei er òg stader der klimaendringane rammar hardast.
- På Várnjárga/Varenkinniem/Varangerhalvøya i Sápmi har eit varmare klima ført til endringar når det gjeld snø, regn og isdanning. Dette påverkar elvedalane som gir liv til halvøya og er ei utfordring både for lokale praksisar og nasjonale retningsliner. Her samarbeider vi med gras- og sauebønder, reindriftsutøvarar og økologar for å forstå korleis elvane nærar grasmark og beitemark – og undersøkjer sambandet mellom vatn, beite og auka gjengroing. Gamle praksisar der ein har pleidd landskapet vert ikkje lenger halde i hevd. Saman med lokale bønder og utøvarar prøvar vi difor ut nye måtar å ivareta produktive landskap, mellom anna gjennom kontrollert brenning. Gjennom dette og andre tiltak ønskjer vi å knyte saman bønder, utøvarar, kommunane og forsking for å finne måtar å forvalte beite som er truga av eit endra klima og usikre vassyklusar.
- Krigføring og klima har skapt store endringar i Sør-Sudan. Fattige lokalsamfunn som Gumbo og Rejaf utanfor Juba er stader som vert hardast råka av desse kreftene. Internt fordrivne i Sør-Sudan har flytta hit for å sikre seg og sine, medan lokale fattige vert ytterlegare marginaliserte. Saman har dei tilgang til Bahr al Jabaal (Nilen), og er avhengige av den, men med tilflytting, konflikt som bakteppe, og med aukande avhengigheit av tekniske nødhjelpssystem, forsvinn lokal kunnskap om vatnet. Gjennom spørjeundersøkingar og samtalar i lokalsamfunna søkjer vi metodar for å inkludere eit mangfald av perspektiv og behov. Me ynskjer å forstå korleis elva bidreg til levesett og korleis lokale system for vassrensing kan best iverksettast og styrast idesse lokalsamfunna. I samarbeid med lokale partnarar ynskjer vi å utvikle arbeidsmetodar som støttar deira humanitære arbeid og styrker lokalkapasitet.
- I Turkana i Nord-Kenya er det å få tak i vatn i eit særs tørt og uforutsigbart klima eit spørsmål om liv eller død. Dei tradisjonelle nomadiske livsformene handterer uforutsigbarheita gjennom mobilitet, men stadig oftare er tilgang til vatn avhengig av permanent infrastruktur, som brønnar. Gjennom tradisjonelle og sanselege etnografiske metodar (film, foto, lydopptak) søkjer vi å synleggjere korleis tilgang til vatn ikkje berre er klimatisk vanskeleg, men òg handlar om kulturell overleving. Vi involverer beitebrukarar, offentlege styresmakter, utviklingsaktørar og lokale forskarar for å forstå samspelet mellom vatn, landskap, mobilitet og planlegging.
- Nettverkspartnarane våre samarbeider òg med Lytton First Nation i Fraser Canyon, British Columbia, der dei handterer tørke, stadig kraftigare skogbrannar og arbeider for rettvis og trygg vassforvaltning av elvene.
I prosjektet møtest desse lokale kunnskapane og utfordringane med ei rekkje praksisbaserte og akademiske fagfelt. University of British Columbia (UBC), University of Colorado Boulder (UCB), Millennium Water Alliance (MWA) og Oxfam bidreg med teknisk ekspertise innan vassingeniørfag og WASH. Arkitektur- og designhøgskolen i Oslo (AHO) og UBC bidreg med innsikt innan landskapsarkitektur, stadsutvikling og framtidsstudiar. Urban A, Oxfam og MWA bidreg med kompetanse innan styring og humanitært arbeid. Ved å samanlikne og konseptualisere framtidige endringar i desse områda, arbeider vi – saman med lokale partnarar og dei som er berørte – med å utvikle eit globalt verktøysett for lokale vassystem, bygd på urfolkskunnskap og lokalkunnskap frå desse stadene.
