Bakgrunn og erfaring
Eg forskar og underviser i by- og stadutvikling, med særskild fokus på Aust-Afrika og Sápmi der eg arbeider med problemstillingar knytt til dekolonialisering, sosial ulikskap, identitet, framtid og klimaendringar. Eg har bakgrunn frå Kenya, Tanzania og Zambia, og har etablert og drive tverrfaglege urbanismepraksisar i både Tanzania og Noreg. Her har eg arbeidd med urbane strategiar for organisasjonar, kommunar, fylkeskommunar og departement.
Undervisning
Eg deler tida mi mellom grunnundervisinga i urbanisme og landskap, og masterkurset Post Growth, der me utforskar klimaendra framtider og klimasamanbrot i Sápmi som set kritisk søkjelys på utvikling og berekraft.
Forskning
Eg er interessert i å utforska dei tverrfaglege overlappa mellom urbanisme og humaniora. Eg har ein doktorgrad i kartlegging, datainnsamling og analyse av komplekse urbane strok i Nairobi. Boka mi The City Makers of Nairobi (Routledge 2020) handlar om afrikansk urban identitet i Nairobi under kolonitida, og syner korleis den afrikanske befolkinga hadde langt større påverknad på byutviklinga enn det som vanlegvis vert framheva. Dei siste åra har eg forska på kvinner si rolle i fattige nabolag i Nairobi under og etter COVID-19, ungdomsmobilitet og samhandling på sosiale medier i bystrok på grensa mellom Sør-Sudan og Uganda, og korleis lokalkunnskap kan bidra til å sikra vassressursar i klimautsette område i Central Equatoria (Sør-Sudan) og Várnjárga/Varenkinniemi/Varangerhalvøya (Noreg).